10 верасня 2013 года а 17 гадзіне ў малой зале Музея сучаснага выяўленчага мастацтва адбудзецца адкрыццё выставачна-тэатральнага праекта «Студыя Палітра», прысвечанага 10-годдзю студыі.
«Непрафесійнае», інтуітыўнае, спантаннае мастацтва заўсёды выклікала асаблівую цікавасць з боку гледачоў і калекцыянераў, а таксама даследчыкаў. Мастацкі кірунак, які шырока распаўсюдзіўся ў сярэдзіне ХХ стагоддзя – ар-брут, ці мастацтва аўтсайдараў – з’яўляецца значным феноменам і ў сучасным мастацкім асяроддзі.
Гэтае мастацтва не арыентуецца на каноны, у ім няма месца выверанасці сюжэта і кампазіцыі. Знаходзячыся па-за культурнай мовай соцыуму, аўтары не звяртаюцца да агульнапрынятых умоўных знакаў, а застаюцца ў рамках асобава – суб’ектыўнага ўспрымання атачальнай рэчаіснасці, або звяртаюцца да эпізодаў штодзённага жыцця.
Сёння паняцце мастацтва аўтсайдараў знаходзіцца ў неразрыўнай сувязі з паняццем арт-тэрапіі, якая служыць развіццю і гарманізацыі асобы. Кірункі арт-тэрапіі адпавядаюць відам мастацтва, а колькасць тэхнік фактычна неабмежавана.
Прадстаўлены праект прысвечаны 10-годдзю плённай рэабілітацыйнай працы студыі «Палітра», якая знаходзіцца ў Первамайскім раёне г. Мінска. Кіраўнік студыі Галіна Кучарэнка. Многія людзі, якія маюць патрэбу ў падтрымцы і аднаўленні сіл, займаюцца тут па праграме актыўнай рэабілітацыі, якая з’яўляецца унікальнай.
Дзесяцігадовая дзейнасць «Палітры» даказвае, што рэабілітацыя праз камунікацыю і творчую дзейнасць магчыма, што людзі «выкінутыя з жыцця» могуць знайсці свой годны і паўнавартасны шлях. Таму студыя «Палітра» — гэта ўнікальная з’ява, а таксама прыклад рэабілітацыйнай працы, якую трэба пашыраць, падтрымліваць і працягваць.
Сёння студыя мае шмат паспяховых кірункаў дзейнасці: працуе мастацкая студыя, створаны тэатр, вядзецца актыўная выставачная дзейнасць. Вялікая ўвага надаецца прырода-тэрапіі і камунікаванню. У студыі праводзяцца заняткі па пластыцы руху і танцах, а таксама многае іншае.
З 10 па 21 верасня ў Музеі сучаснага выяўленчага мастацтва можна будзе не толькі ўбачыць каля 40 мастацкіх прац «палітраўцаў», але і пазнаёміцца з тэатральным, канцэртным і арганізацыйным жыццём «Палітры»:
10 верасня – 17.00 – адкрыццё
11 верасня – 18.30 – спектакль «Снежная каралева»
12 верасня – 18.30 – спектакль «Папялушка»
13 верасня – 15.00-17.00 – семінар «Арт-тэрапія сёння»
14 верасня – 13.30 – закрыццё праекта
Выстаўка працуе да 21 верасня 2013 года.
Аддзел выставак: +375 (17) 288 24 68
