21 верасня Студэнцкае этнаграфічнае таварыства і Дзяржаўны літаратурны музей Янкі Купалы запрашаюць у Вязынку (д. Вязынка, п/о Радошковичи, Молодечненский район, Минская обл) адзначыць традыцыйнае восеньскае свята Багач. Пачатак у 12:00.
У беларускім календары Багач прымеркаваны да заканчэння збору ўраджаю ("да гэтага часу ў кожнага ўсяго багата”) і першаму запальванню хатняга "агменю” — васковай свечкі ў лубку з жытам, якую ставяць на покуць і захоўваюць там на працягу ўсяго года, што прыносіць у дом багацце і шчасце.
На свяце выступяць спеўныя і інструментальныя гурты, такія як "Варган", "Горынь", Dainava, Guda, "Кудмень", "Рада", капэла "На Таку", дуэт Васіля Грыня разам з Юліяй Літвінавай, а таксама дуэт Рамана Яраша і Юліі Літвінавай і іншыя. Адмысловым госцем будзе аўтэнтычны гурт з Гарадзеншчыны.
Для дзяцей і дарослых пройдуць разнастайныя майстар-класы па рамёствах. Таксама будзе працаваць гульнявая пляцоўка, кірмаш. Можна будзе пакаштаваць стравы традыцыйнай кухні, сапраўдны хлеб і натуральны мёд, патанцаваць народныя танцы. Акрамя гэтага, мы плануем арганізаваць да свята шэраг іншых прыемных нечаканасцяў.
Нам хацелася б, каб гэтае свята стала для яго ўдзельнікаў і гасцей не толькі месцам выдатнага адпачынку на вольным паветры, але і пляцоўкай для жывога творчага ўзаемадзеяння, у працэсе якога толькі і можа захоўвацца і перадавацца традыцыя.
Як даехаць: электрычка з Мінска едзе ў 10.50, прыбывае ў Вязынку ў 11.42. Назад з Вязынкі можна ехаць у 16.07, 16.45, 17.57.
Удзел у свяце вольны, але для ўваходу на тэрыторыю музея трэба будзе купіць квіток (10 000 руб., студэнтам — 7000, школьнікам — 5000 руб.)
З пытаннямі звяртайцеся на нумар: +37529 8425789 (Наста)
