Якуб Колас значную частку свайго жыцця прысвяціў педагагічнай працы. Пачынаў так званым народным настаўнікам (так называлі тых, хто вучыў сялянскіх дзяцей у вясковых школках). Народны паэт стаў аўтарам цудоўных дзіцячых твораў «Савось-распуснік», «Міхасёвы прыгоды», «Рак-вусач» і іншых, якія і па сённяшні дзень радуюць маленькіх чытачоў.
Сведчаннем павагі дзяцей да пісьменніка з’яўляюцца драўляны бюст самога Коласа, зроблены выхаванцамі Чавускага дзіцячага дома на 70-гадовы юбілей паэта, а таксама ручнік, вышыты выхаванцамі мінскага палаца піянераў. У фондах музея захоўваецца шмат надзвычай шчырых лістоў, напісаных дзіцячым почыркам. Прыходзілі яны з розных куточкаў нашай краіны – з малюнкамі, паштоўкамі, віншаваннямі, проста словамі падзякі, вершамі на суд Майстра… Не гледзечы на паўсядзённую занятасць і недахоп часу, ён знаходзіў магчымасць адказваць на гэтыя лісты і дапамагаць тым, хто звяртаўся за дапамогай.
Да Дня нараджэння пісьменніка Дзяржаўны літаратурна-мемарыяльны музей Якуба Коласа ладзіць традыцыйны дзіцячы ранішнік «Казкі жыцця», які адбудзецца 25 кастрычніка а 14-й гадзіне. Пад час свята ў кожнага наведвальніка з’явіцца магчымасць апынуцца сярод герояў сусветнавядомых казак, прыдумаць свайго казачнага персанажа і нават самаму стаць героем казкі. «Казкі жыцця» – свята, якое дазволіць не толькі цікава правесці час, але і пазнаёміцца бліжэй з творчасцю Якуба Коласа і з гасцінным домам песняра. Усе ўдзельнікі мерапрыемтсва атрымаюць памятныя падарункі!
