Анастасія Адамовіч, аўтар мастацкіх лялек, не першы раз прымае ўдзел у выставах музея. Яе лялькі ўдзельнічалі ў «Ночы музея» ў 2016 годзе, а ў 2009 яна паказвала сваіх герояў на персанальнай выставе. Дарэчы, Анастасія вельмі актыўны аўтар. На працягу апошніх пяці гадоў яна ўдзельнічае ў 3-4 выставах штогод – такая ў яе прага да творчасці і велізарны патэнцыял. Яна прыдумвае персанажы, назіраючы за сваімі сучаснікамі, вывучаючы партрэтную творчасць жывапісцаў ранейшых стагоддзяў, перачытваючы любімыя літаратурныя творы. Такім чынам, у абліччы і характары яе герояў узнікае сплаў характэрных і індывідуальных рыс.
Анастасіі блізкія казачныя, міфічныя персанажы (бабкі-ёжкі, дамавікі, анёлы), дзяўчынкі-прынцэсы з пухнатымі крылцамі і ва ўборах нявыказанай прыгажосці з цацкамі ў руках. Ад іх цяжка адвесці вочы: настолькі чароўная іх магія. Стварэнне лялькі дае аўтару магчымасць праявіць сябе ў якасці мастака, скульптара, цырульніка, дызайнера і візажыста. Аксесуары, уборы, абутак, прычоскі – усё гэта плён фантазіі лялечніцы і яе віртуозная тэхніка выканання. Яе лялек хочацца параўнаць з лепшымі музычнымі творамі, дзе кожная нотка выверана і заняла самую выйгрышную пазіцыю.
Сучасная аўтарская лялька, з аднаго боку, захоўвае генетычную сувязь з традыцыйным светам лялек, з другога – выходзіць у зусім іншую сферу: гэтыя лялькі вольныя ад якога б там ні было функцыянальнага прызначэння, акрамя эстэтычнага. Такая лялька не прызначана для гульні, затое яе прыемна сузіраць, ёю можна любавацца.
Аўтарская мастацкая лялька – дастаткова новы від выяўленчага мастацтва. Перадумовы да ўзнікнення гэтага феномену можна выявіць у першыя гады XX стагоддзя, аднак інтэнсіўнае развіццё ён атрымлівае ў 1980–2000-я гады ў Заходняй Еўропе і ЗША. Крыху пазней цікавасць да аўтарскай лялькі выявілася і ў краінах Усходняй Еўропы. Гэтаму спрыялі з’яўленне новых матэрыялаў і тэхналогій вытворчасці: пластычныя матэрыялы, трэс, тэкстыль, акрыл і іншыя. На сённяшні дзень можна вылучыць дзве асноўныя методыкі стварэння лялькі: скульптурная і калажная. Скульптурная патрабуе наступных этапаў: эскіз, стварэнне асноўнага аб’ёму, роспіс, замацаванне на падстаўцы. Калажная мае на ўвазе большую колькасць неабходных этапаў: эскіз, стварэнне асобных скульптурных частак (лепка, адліўка, разьба па дрэве і інш.), роспіс, выраб парыка/прычоскі, касцюма, аксесуараў, распрацоўка каркаса, замацаванне лялькі на падстаўцы. Праца па стварэнні лялек шматступенная, разнастайная і карпатлівая, але менавіта таму і займальная.
Штогод праходзяць міжнародныя выставы і фестывалі аўтарскай лялькі. Творы вядомых майстроў прадаюцца на знакамітых аўкцыёнах. Цікавасць да аўтарскай лялькі з кожным годам у свеце толькі павялічваецца.
