Чулі пра 500-годдзе беларускага кнігадрукавання, але не зусім у тэме? (Не зусім зразумела, што да чаго…) Далучайцеся да інтэрактыўнай акцыі «Чытаем Скарыну разам» і даведайцеся ва ўсіх падрабязнасцях, хто такі Францыск Скарына і чым ён займаўся!
Акцыя стартуе 5 верасня а 16-й гадзіне ў Нацыянальнай бібліятэцы Беларусі і працягнецца два дні – да 21-й гадзіны 6 верасня. На ўрачыстым адкрыцці дырэктар Нацыянальнай бібліятэкі Беларусі Раман Матульскі і дырэктар Мінскага гарадского педагагічнага каледжа Кацярына Пятруцкая агучаць урыўкі з кніг Скарыны і прывітаюць першых удзельнікаў акцыі. Далей − праграма вольная. На працягу двух дзён будуць працаваць тэматычныя пляцоўкі, дзе кожны наведвальнік, незалежна ад узросту, зможа пазнавальна правесці час.
Самых маленькіх запрашаюць у «Дзіцячы куток», дзе для іх 5 верасня з 19.00 да 20.00 пройдзе займальны тэматычны ўрок «Францішак Скарына – наш слаўны першадрукар», і абодва дні з 18.00 да 19.00 будзе праходзіць майстар-класс па арыгамі «Падарунак Скарыны».
6 верасня а 19-й гадзіне дзяцей чакаюць вясёлыя актыўнасці ад вядомага ўсёй сталіцы праекта «ЗаЧтение». І, канешне, не абыдзецца без мультфільмаў пра яе вялікасць Кнігу. Замацаваць пачутае і ўбачанае юныя гісторыкі змогуць на выстаўцы дзіцячых кніг пра першадрукара.
У «Маладзёжным кутку» таксама будзе дзейнічаць выстаўка папулярнай мастацкай літаратуры пра Скарыну – кнігі больш сур’ёзныя, аднак такія ж цікавыя і пазнавальныя. Тут жа можна будзе паспрабаваць сябе ў ролі першадрукара і паўдзельнічаць у майстар-класе па кнігадрукавнню.
На пляцоўцы «Навукоўцы пра Скарыну» 5 верасня а 17-й гадзіне адбудзецца сустрэча з намеснікам дырэктара Нацыянальнай бібліятэкі Беларусі, скарыназнаўцам Аляксандрам Сушай, які адкажа на пытанні і паведаміць шмат цікавага і новага з жыцця Францыска Скарыны. А тое, што будзе недаказана, шукайце на выстаўцы навуковай літаратуры і артыкулаў з часопісаў і газет пра Скарыну і чэрпайце з мастацкіх і дакументальных фільмаў пра славутага палачаніна ў «Кіназале».
6 верасня а 15-й гадзіне ў галерэі «Ракурс» (2-гі паверх) чакаем на адкрыццё выстаўкі шрыфтоў і каліграфіі Усевалада Свентахоўскага «Літары і словы Скарыны».
Каб цалкам адчуць смак дзеяння, не забудзьце звярнуць на пляцоўку «Скарынаўскія скарбы «дыямента», дзе вы пабачыце «кароннае» юбілейнае выданне − «Кніжную спадчыну Францыска Скарыны». Увесь шматтомнік − не ў шафе і не пад шклом сцелажа, а адкрыты для знаёмства і чытання!
Уваход − вольны! P.S. Той рэдкі выпадак, калі і чытацкі білет не патрабуецца.
