Грамадскае аб'яднанне "Гільдыя керамістаў" ладзіць свой першы фестываль керамікі. На фестываль у Ракаве з'едуцца керамісты са шматлікіх куткоў Беларусі, якія працуюць у розных матэрыялах і тэхніках. Вы зможаце не толькі набыць іх работы, але таксама даведацца пра тэхналогію вытворчасці вырабаў. Калі вы ніколі не бралі ў рукі гліну, але заўсёды марылі – на фестывалі ў вас будзе шмат магчымасцяў спраўдзіць мары і нават паўдзельнічаць у конкурсе па ганчарстве. Паляпіць і паганчарыць змогуць і дарослыя, і дзеці, а на беразе ракі будзе працаваць пленэр па роспісу керамікі. Уявіце сабе, як прыемна маляваць ды ляпіць, калі побач гучыць жывая музыка… Суправаджэнне майстар-класаў, спаборніцтваў ды конкурсаў музыкамі на гітарах, акардэоне, скрыпках альбо дудзе – незабыўныя ўражанні застануцца з вамі надоўга. На сцэне фестывалю выступяць розныя калектывы мастацкай самадзейнасці, а пасля 16.00 пачнецца канцэрт, дзеля якога варта прыехаць 19 траўня ў Ракаў.
Аматары актыўнага адпачынку змогуць паспрабаваць свае сілы і спрытнасць у розных спаборніцтвах: пастраляць з рагатак па гаршках, паўдзельнічаць у "бітве кантрабандыстаў", паблукаць у лабірынце. Што цікава, за актыўны ўдзел вы можаце зарабіць "тэракоцікі" – валюту фестываля – і абмяняць іх на вырабы майстроў.
На фестывалі будзе цікава і тым, хто марыць зрабіць кераміку сваім хобі. З чаго пачаць, дзе ўзяць матэрыялы – пра ўсё даведаецеся тут.
Дапамагчы праекту ды набыць квіток можна тут.
Фестываль адбудзецца 19 траўня 2018 г. 12.00-22.00
Шмат цікавостак, у тым ліку:
- стральба з рагатак;
- пленэр (роспіс па парцаляне);
- шмат гліны і ганчарных кругоў для ўсіх ахвотнікаў;
- лепка для дзяцей;
- жывая музыка;
- аўтарская кераміка ад беларускіх майстроў.
