Зялёныя святкі (Сёмуха, Тройца) - старажытнае земляробчае свята ў беларусаў і іншых славянскіх народаў, якое адзначаецца на сёмым тыдні пасля Вялікадня і сімвалізуе канец вясны і пачатак лета, праз ушанаванне зеляніны, дрэў і кветак, якія знаходзяцца ў сваім росквіце.
У гэты час уся ўвага была скіравана да дрэў, як да сакральных аб’ектаў, і самым ушанаваным дрэвам была бяроза. Менавіта ў яе вобразе ўшаноўваецца расліннасць – носьбіт жыватворчай моцы зямлі і сонца. Бярозка («май») была асноўным атрыбутам траецкай абраднасці. Яе ставілі на падворках, на ганку, ля брамы, бярозавымі галінкамі аздаблялі сцены хат. Пасля свята, гэтую зеляніну захоўвалі напрацягу года і верылі ў яе магічную абараняльную моц.
У гэты дзень беларусы сустракаюць росквіт прыроды карагодамі, песнямі, танцамі і варожбамі, што і будзе адбывацца на тэрыторыі музея.
У праграме мерапрыемства:
- Расповед пра траецкую зеляніну і зёлкі;
- Абрад ушанавання траецкага дрэва – бярозы;
- Траецкія дзявочыя абрады – завіванне бярозкі, пляценне вянкоў з галінак бярозы, карагоды і траецкія песні, кумаванне і інш;
- Майстар-клас па пляценню вянкоў з галінак бярозы;
- Варажба на вянках;
- Традыцыйныя траецкія спевы, гульні і танцы пад беларускія народныя інструменты.
За дадатковую плату можна:
- набыць сувеніры ад народных майстроў;
- наведаць «Беларускую карчму», якая знаходзіцца на тэрыторыі музея.
Кошт квіткоў:
- для дарослых – 8.00 руб.;
- для дзяцей школьнага ўзросту – 4.00 руб.;
- для дзяцей дашкольнага ўзросту – бясплатна.
Экспазіцыя музея працуе з 11:00 да 19:00. Каса працуе з 11:00 да 18:30.
- Калі ласка, паклапаціцеся пра абутак і вопратку згодна з умовамі надвор’я.
- Музей пакідае за сабой права адмены ці замены асобных эпізодаў мерапрыемства ў залежнасці ад умоў надвор’я.
