26 верасня 2019 года ў 17.00 Дзяржаўны літаратурна-мемарыяльны музей Якуба Коласа ў рамках музейнага праекта «Выдатныя імёны сусветнай літаратуры» арганізоўвае літаратурна-музычны вечар «Сябар чалавецтва», прымеркаваны да 220-гадовага юбілею Аляксандра Сяргеевіча Пушкіна.
Якуб Колас яшчэ ў дзяцінстве выявіў свае асаблівыя стасункі з рускай класікай. Наймацней яго ўразіў эстэтычны бок паэзіі А.С. Пушкіна: «Я добра помню: у дзіцячыя гады ў маёй пастухоўскай торбе ляжаў невялікі, добра патрапаны томік пушкінскай паэзіі. Як я чытаў яго! Наўзахапкі і шкадуючы, пакідаючы на заўтра. Чытаю-чытаю, аж пакуль не вывучу старонку на памяць».
Так пачаўся шлях да вялікага рускага паэта Якуба Коласа, а 1937 г. голас А.С. Пушкіна загучаў па-беларуску – да 100-годдзя з дня смерці класіка рускай літаратуры народны паэт Беларусі пераклаў знакамітую паэму «Палтава».
Цягам усяго свайго жыцця Якуб Колас у публіцыстычных артыкулах, бібліяграфічных нарысах не раз выказваў захапленне геніем рускага паэта, які, безумоўна, меў магутны ўплыў на фарміраванне мастацкага таленту беларускага Песняра: «...калі б не было Пушкіна з яго "Анегіным”, одай "Вольнасць” і "Пасланнем у Сібір”, "Капітанскай дачкой” і казкамі, – не было б, пэўна што, і маіх паэм "Новая зямля” і "Рыбакова хата”, маёй лірыкі і прозы».
У рамках святочнага вечара будзе дзейнічаць выстаўка, арганізаваная сумесна з Мінскай абласной бібліятэкай імя А.С. Пушкіна. На ёй будуць прадстаўлены пераклады А.С. Пушкіна на беларускую мову, а таксама поўны збор твораў рускага паэта выдання пачатку ХХ ст., які, з успамінаў старэйшага сына Коласа Данілы Канстанцінавіча Міцкевіча, знаходзіўся ў даваеннай бібліятэцы беларускага класіка.
На літаратурна-музычным вечары ў музеі Якуба Коласа плануецца выступленне літаратараў, паказ урыўка з драматычнага монаспектакля "Абранніца” Беларускага паэтычнага тэатра аднаго акцёра "Зніч” у выкананні мастацкага кіраўніка-дырэктара і заснавальніка Галіны Дзягілевай. Таксама адбудзецца чытанне вершаў А.С. Пушкіна як у арыгінале, так і ў перакладзе на беларускую мову. Музычным аздабленнем імпрэзы стануць рамансы на словы А. С. Пушкіна ў выкананні навучэнцаў Мінскага дзяржаўнага музычнага каледжа імя М.І. Глінкі.
