Упершыню ў Беларускім дзяржаўным музеі народнай архітэктуры і побыту будзе праводзіцца ваенна-гістарычны фестываль па рэканструкцыі падзей Першай сусветнай вайны, арганізатарам якога апрача музея з’яўляецца культурна-гістарычны фонд памяці Першай сусветнай вайны "Крокі”. Гэтая вайна незаслужана забыта, хаця аказала вялікі ўплыў на Беларусь: 700 тысяч беларусаў была рэкрутавана ў Рускую імператарскую армію, больш за 2 мільёны выгнаны ў бежанцы. Вайна згубіла 3 імперыі, у тым ліку і Расійскую, што стала штуршком да набыцця беларусамі сваёй дзяржаўнасці. Але варта памятаць, што гэта была адна з самых крывавых войнаў у гісторыі чалавецтва. Беларусь страціла больш за 1 мільён чалавек, былі спалены тысячы вёсак і мястэчак.
У музеі прадстаўлена беларуская вёска канца ХIХ – пачатку ХХ стст. Менавіта праз такія вёскі ў 1915 г. праходзіла лінія фронта Першай сусветнай вайны ў Беларусі, якая на доўгія гады падзяліла нашу краіну на дзве часткі. Наш абавязак памятаць і аддаваць даніну павагі тым нашым продкам, якія загінулі за сваю зямлю на той страшнай і вялікай вайне.
Асноўнае дзеянне фестывалю - бой за беларускую вёску паміж нямецкімі і расійскімі войскамі ў 1915 годзе ў рамках т. зв. "Свянцянскага прарыву" - прарыву рускага фронту нямецкімі войскамі, калі перадавыя нямецкія часткі дайшлі да Мінска, але былі адкінутыя.
У праграме фестываля:
- рэканструктары Першай Сусветнай - людзі, якія рэканструююць розныя часткі Рускай імператарскай і Германскай арміі ў поўным рыштунку ў адпаведнасці з гістарычнымі крыніцамі і антуражнымі прадметамі побыту Першай сусветнай;
- Анімацыйны лагер для гасцей музея:
- Палявы лагер рускага войска, у якім паказваецца побыт і страявая падрыхтоўка рускіх вайскоўцаў;
- Шпіталь Чырвонага крыжа - інтэрактыўная выстава, прысвечаная працы сясцёр міласэрнасці ў Першай сусветнай вайне;
- Штыкавы бой - інтэрактыўная кропка, на якой гасцей навучаць правільна карыстацца са штыком з дапамогай макета вінтоўкі Мосіна;
- "Філвордъ” – атракцыён з акрэсленнем словаў у дарэвалюцыйнай арфаграфіі;
- Палявая пошта – пошта, якая дасць магчымасць адправіць копію дарэвалюцыйнай паштоўкі з выглядам горада Мінска;
- Лётная школа - інтэрактыўная кропка, на якой лётчык Першай сусветнай правядзе экзамен на веданне лётнай справы;
- Грэнадзёрскі ўзвод - грэнадзёрскія курсы, на якіх гледачы навучацца правільна кідаць макеты гранатаў Першай сусветнай;
- Выпіска дваранскіх грамат для гледачоў пасля здачы экзамену на прыналежнасць да дваранскага саслоўя;
- Стралковы цір – інтэрактыўны цір з мадэлямі зброі Першай сусветнай;
- Гульня ў гарадкі;
- Кавалерыйскія курсы, дзе наведвальнікаў навучаць правільна карыстацца шашкай;
- Рэканструкцыя бою Першай сусветнай вайны 1915 года "Свенцянскі прарыў": бой паміж нямецкімі і рускімі войскамі;
- Тэматычная фотазона з легендарным кулямётам "Максім", антуражным адзеннем;
- Выстава старых фотаздымкаў Першай сусветнай вайны.
Экспазіцыя музея працуе з 11:00 да 19:00.
Шаноўныя наведвальнікі!
- Калі ласка, паклапаціцеся пра абутак і вопратку згодна з умовамі надвор’я.
- Музей пакідае за сабой права адмены ці замены асобных эпізодаў мерапрыемства ў залежнасці ад умоў надвор’я.
Як знайсці?
Музей знаходзіцца ў 4-х км ад МКАД за аўтарынкам «Малінаўка», каля аг. Азярцо.
Праезд ад аўтастанцыi «Паўднёва-Заходняя», прыпынку «Пятроўчына», «Малінаўка-6» ідуць прыгарадныя аўтобусы ў накірунку: Мiнск –Дубянцы, Заходнія могілкі (170Э), Чыкі (355); ад прыпынку «Пятроўчына» – маршрутнае таксі 1277.
