Беларускі дзяржаўны музей народнай архітэктуры і побыту запрашае 25 красавіка 2015 года з 15:00 да 18:00 на канцэртна-абрадавую дзею Юр’я».
Юр’я - старажытнае свята народнага календара адзначаецца 6 траўня (23 красавіка па старым стылі) у гонар святога Георгія-пераможца — заступніка свойскай жывёлы і сялянскай нівы. У хрысціянскія часы яму былі нададзеныя рысы і функцыі язычніцкага бога Ярылы.
Веснавы Юр’я знаменаваў сабою сапраўдны пачатак вясны. Менавіта з гэтага дня, як лічылі амаль усюды, пачынае кукаваць зязюля, зямля і ўвесь раслінны свет апранаецца ў зеляніну. Юр’я, як правобраз веснавога Сонца разбівае злыя чары зімы, абуджае зямлю і пускае на яе расу, ад якой усё жывое на зямлі набірае рост і моц. На Юр’е сяляне выходзілі з песнямі і ахвярнымі стравамі аглядаць свае зарунелыя палеткі. З Юр’ем звязваўся, як правіла, і першы выпас жывёлы. Адначасна з апякунствам свойскай жывёлы Юр’я лічыўся валадаром ваўкоў. У народзе ўяўлялі, што Юр’я едзе на белым кані і замыкае пашчы дзікім звярам, пасля чаго тыя менш нападаюць на скаціну. Свята было напоўнена шматлікімі абрадавымі дзеяннямі, песнямі, павер’ямі, прыкметамі заклінальнага характару.
Апершыню пад час мерапрыемства кожны наведвальнік зможа паўдзельнічаць у абрадавых дзеях свята «Юр’я». Кульмінацыяй канцэртна-абрадавай дзеі «Юр’я» стане «Тураўскі карагод», які ўнесены ў спіс помнікаў нематэрыяльнай культурнай спадчыны Рэспублікі Беларусь у выкананні народнага фальклорнага ансамбля «Міжрэчча» з вёскі Пагост Жыткавіцкага раёна Гомельскай вобласці. Наведвальнікі ўбачаць працэс ўпрыгожвання каравая, абыход двароў, абыход жытнёвай нівы і нават пачастуюцца «юраўскай яешняй» пад гукі дудаў, бубнаў ды гармоніка.
Сваю канцэртную і гульнёва-забаўляльную праграму прапануюць фальклорныя калектывы Беларускага дзяржаўнага ўніверсітэта культуры і мастацтваў: «Этна-Суполка», «Страла», «Раме», «Вяснянка», «Гуды», а таксамам дзіцячыя і маладзёвыя гурты «Мілавіца», «Верабейкі», «Явар», «Рада». Госці свята - гурт «Жалейка» (Літва).
Усе жадаючыя прымуць удзел у навучальных майстар-класах па беларускім танцам і гульням. Самых маленькіх наведвальнікаў мерапрыемства чакае: батлеечны спектакль, цікавыя гульні на дзіцячай пляцоўцы .
Канцэртна-абрадавая дзея «Юр’я» праходзіць у рамках IX Міжнароднай канферэнцыі «Аўтэнтычны фальклор: праблемы бытавання, вывучэння, успрымання».
За дадатковую плату: наведванне Карчмы, пабыццё сувеніраў ад Беларускага саюза майстроў народнай творчасці,. катанне на конях, поні і гужавым транспарце.
Экспазіцыя музея працуе з 11.00 да 19.00. Каса працуе з 11.00 да 18.00.
Шаноўныя наведвальнікі!
Калі ласка,паклапаціцеся аб абутку і вопратцы згодна ўмоў надвор’я.
Музей пакідае за сабой права адмены ці замены асобных эпізодаў мерапрыемства.
Кошт квiткоу
60 000 руб.
40 000 руб. – для навучэнцаў ВНУ, ССНУ
30 000 руб. – для вучняў
дзеці дашкольнага ўзросту – бясплатна
