У перыяд з 29 сакавіка па 23 мая 2021 г. музеі Мінска запрашаюць жыхароў сталіцы разам са сваімі сем’ямі выправіцца ў незвычайнае падарожжа па мудрагелістых музейных «лабірынтах». Запрашаюць да ўдзелу ўсёй сям'ёй. Суперпрыз – сямейная вандроўка па Беларусі.
Захапляльны маршрут будзе пралягаць праз Беларускі дзяржаўны музей гісторыі Вялікай Айчыннай вайны, Дзяржаўны літаратурны музей Янкі Купалы, Музей гісторыі тэатральнай і музычнай культуры, Музей гісторыі горада Мінска, Літаратурны музей Петруся Броўкі і Беларускую хатку.
Што чакае ўдзельнiкаў падчас музейных прыгод?
Таямнічыя і займальныя маршруты, захапляючы працэс пошуку і радасць адкрыццяў! Якая б тэма не ўваходзіла ў кола інтарэсаў сям’і – гісторыя, тэатр, літаратура – музеі задаволяць самых дапытлівых, а маляўнічыя пуцяводнікі дапамогуць не заблукаць у музейных «лабірынтах».
«Музейныя лабірынты» падораць незабыўныя ўражанні і яркія эмоцыі як дарослым, так і іх дзецям, а веснавыя школьныя канікулы могуць стаць пачаткам сямейных адкрыццяў!
Правiлы ўдзелу:
- Праект разлічаны на групавых удзельнікаў (найперш, сямейныя каманды). Колькасць чалавек у камандзе – не больш за 5.
- Распачаць вандроўку можна з любога музея.
- У Музей гісторыі Вялікай Айчыннай вайны неабходны папярэдні запіс па тэл. +375 17 203-07-92, +375 29 144 07 92.
- У першым музеі маршрута камандзе будзе выдадзены пашпарт удзельніка.
- Кожны музей прапаноўвае камандам-удзельнікам сваю праграму-заданне.
- Перамяшчацца па музеях можна ў адвольным парадку. Галоўнае – прайсці ўсе 6 музеяў, у кожным з іх атрымаць пячатку.
- Пакінуць пашпарт неабходна ў апошнім музеі.
- Тэрмін удзелу – з 29.03.2021 па 23.05.2021.
- Урачыстае падвядзенне вынікаў адбудзецца 29.05.2021 у Беларускім дзяржаўным музеі гісторыі Вялікай Айчыннай вайны.
ПРЫЗЫ. Усе каманды атрымаюць ад арганiзатараў «Музейных лабiрынтаў» памятныя сувеніры. Самыя нястомныя, кемлівыя і дапытлівыя, хто не сыйдзе з дыстанцыі, возьмуць удзел у розыгрышы Суперпрыза – сямейнай вандроўкі па Беларусі ад генеральнага партнёра праекта – Нацыянальнага агенцтва па турызме.
