Выдавецтва «Открытая книга» прапануе ўвазе чытачоў кнігу «Пачастунак
для цмока», аўтары Алена Масла, Ларыса Мятлеўская. Неверагодная казачная гісторыя адбываецца ў сучасным Мінску. Двое
кухцікаў з палаца князя Радзівіла трапляюць у сучасны Мінск, і, каб вярнуцца
дадому, ім неабходна выканаць складанае заданне: прыгатаваць 12 страў
старасвецкай кухні і адолець цмока.
У гэтым ім дапамогуць новыя сябры: даследчык і гісторык прафесар
Мяльдзіс, знаўца старабеларускай кухні пані Лора, пані Мышковіч –
супрацоўніца музея – і музыка пан Яраш. Цікава, што кожны з гэтых герояў мае
рэальны прататып!
Добрая дзіцячая кніга – гэта тая, якая будзе цікавай і захапляльнай як для
дзяцей, так і для дарослых. Калі на старонках карыснае і цікавае для сябе
знойдуць усе. Калі бацькі будуць з задавальненнем чытаць кнігу дзіцяці, а
маленькі чытач з захапленнем дзяліцца прачытаным. «Пачастунак
для цмока» менавіта такая кніга!
Маленькія чытачы з дапамогай дарослых змогуць прыгатаваць простыя,
але вельмі смачныя стравы старабеларускай кухні, даведаюцца пра гісторыю
бульбы, чаю і іншых прадуктаў, пра смаргонскія абваранкі, «мядзвежую»
акадэмію і, канешне, пра тое, чым беларускі цмок адрозніваецца ад сваіх
еўрапейскіх братоў.
Дарослыя таксама знойдуць для сябе шмат цікавых фактаў з гісторыі і
культуры Беларусі: гэта і старадаўнія сакрэты вядзення гаспадаркі, і
каларытныя самабытныя слоўцы, і захапляльныя факты з гісторыі Мінска і
Беларусі, а таксама чароўныя старажытныя легенды.
Аўтарам удалося стварыць непараўнальную, каларытную атмасферу,
з’яднаўшы шляхецкую, старасвецкую Беларусь і сучасны Мінск з яго
асфальтам, хмарачосамі і смартфонамі.
Алена Масла – дзіцячая пісьменніца, рэдактар, журналіст, член
рэдакцыйнай калегіі часопіса «Вясёлка»; лаўрэат шматлікіх літаратурных прэмій, у тым ліку лаўрэат Міжнароднай літаратурнай прэміі В. В. Біянкі ў
намінацыі «Казка» (2019).
Ларыса Мятлеўская – этнограф, артыстка, тэлевядучая. Разам са
здымачнай групай тэлебачання вандруе па Беларусі ў пошуках рэцэптаў
традыцыйных страў для праграмы «Беларуская кухня». Аўтар кнігі «Беларускі
кулінарны сшытак № 1».
Малюнкі да кнігі стварыла маладая беларуская мастачка Ганна Новік.
Ілюстрацыі выкананы акварэллю, што надае кнізе адменную стылістыку і
каларыт.
Кніга мае 120 старонак, надрукавана на якаснай мелаванай паперы.
